Categories
Sawaal - Jawaab

Sawaal-Jawaab-44

👉 Sms prepared by 👈
ZEBNEWS

* Monday *** SawaL-JawaB ****

Sawal — Musafir ke ehkaam batayein

Jawab — 92.5 kilometer ka safar karne par musafir ke ehkaam laagu honge to ab wo kasr karega matlab zohar asr isha ki 4 raqat farz ki jagah 2 raqat padhega wo bhi agar tanha padhta hai to warna agar jamaat se padhta hai to fir jaisa imaam padhaaye padhe,aur sunnat wa nawafil me koi kami nahi hogi haan agar safar jaari rakhta hai aur jaldi me hai to sunnat wagairah maaf hai,ye bhi samajh lijiye ki 1 shakhs mumbai ko nikla magar wahan use 20 din thaharna hai to raaste bhar to wo kasr karega magar jaise hi mumbai pahunchega wo muqeem ho jayega kyunki 15 din se kam thaharne par hi wo musafir kahlayega aur use 15 din se zyada thaharna hai to wo musafir nahin,haan gaya to tha 15 din se kam ke liye magar wahan phir kuchh din rukna pada aur wo muddat bhi 15 din se kam hai to ab bhi wo musafir hi hai,yunhi agar 10-10 din karke saal bhar bhi thahar gaya to musafir hi rahega magar ye majburi ke tahat hai maslam viza wagairah lagwane ke liye gaya hai aur agent ikattha waqt nahin bata raha balki 10 din 12 din kahkar taal raha hai to is soorat me jab tak bhi rahega kasr hi karega haan agar ye kahde ki 15 se 20 din lagenge to ab musafir na hoga balki muqeem hoga aur namaz poori padhega,yunhi agar maaz ALLAH safar me namaz tark ki to jab bhi uski qaza padhega kasr hi padhega agar che apne watan wapas aakar padhe

📕 Fatawa razviyah,jild 3,page 669

Sawal — Ladka aur ladki ke beech agar affair ho to kis tarah usko khatm karaya jaaye

Jawab — Har namaz ke baad 125 baar YA SALAAMO YA HAADI padhkar dua karen awwal aakhir 9,9 baar durood sharif,kisi bhi najayaz taalluqat ko khatm karne ke liye padha ja sakta hai

📕 Ruhani ilaaj,safah 204

Sawal — Imaam ke surah faatiha khatm karne par kuchh log badi zor se aameen kahte hain iska kya hukm hai

Jawab — Khilafe sunnat hai 26 hadise paak is masle par maujood hai ki imaam ho ya muqtadi akela padhta ho ya jamaat se jahri namaz ho ya sirri magar aameen aahista hi kahi jayegi

📕 Ja’al haq,jild 2,safah 42

Sawal — Aayte sajda agar mobile me kisi ne bhej di aur use dekha magar padha nahin to kya tab bhi sajda karna padega

Jawab — Sirf dekhne se agar che quran me hi ho sajda waajib nahin

📕 Bahare shariyat,hissa 4,safah 67

Sawal — Agar muqtadi ki kuchh rakat namaz choot chuki ho aur bhoole se wo imaam ke saath salaam pher de to kya fauran wahin se namaz shuru kar sakta hai ya padhni padegi

Jawab — aisi surat me 3 baatein hoti hai pahli ye ki agar ye sochkar salaam phera ki mujhe bhi pherna chahiye jab to fauran hi namaz faasid ho gayi sire se padhe aur agar bhoole se salaam pher diya to agar imaam ke saath fauran hi fera aur yaad aate hi wapas laut aaya to koi harj nahin aur agar imaam ke salaam pherne ke kuchh second baad salaam phera aur yaad aaya to wapas laut aaye magar ab aakhir me sajda sahu kare

📕 Bahare shariyat,hissa 1,safah 138

Sawal — Main ek student hoon aur maine abhi haal hi me daadhi rakhi hai magar kuchh log hain jo mera mazaak udaate hain aur wo musalman hain to main kya karun

Jawab — Masha ALLAH aap ne taareef layaq kaam kiya hai is zamane me sunnat par amal karna kisi jihaad se kam nahin hai,hadise paak me aata hai ki huzoor sallallaho taala alaihi wasallam irshaad farmate hain ki jisne meri kisi sunnat ko zinda kiya to usko 100 shahido ka sawaab milega aur ek shaheed ko kitna sawaab milta hai ye ALLAH aur uska rasool hi jaane,aap ispar qaayam rahen aur logon ki fikr na karen waise bhi ulmaye ikraam farmate hain ki jisne kisi sunnat ka mazaak udaaya wo kaafir hai,to ek kaafir kab chahega ki aap islaam par amal karen lihaza waswaso ko apne dil me aane hi na dein

📕 Ibne maaja,jild 3,safah 360

📕 KItabul kabayer,safah 260

Sawal — Kya qabr par paani bhi chhidka jaata hai

Jawab — Bilkul chhidka jaata hai aur riwayat me aata hai ki huzoor sallallaho taala alaihi wasallam ke saahab zade hazrat ibraheem ki qabr par paani chhidka gaya tha

📕 Madarejun nubuwat,jild 2,safah 775

Sawal — Aurto ka kisi bhi mazaar par jaana najayaz kaha jaata hai to huzoor ki qabre anwar par jaana kaisa hai

Jawab — Bhai jaan rauzaye anwar ki haaziri ke baare me ulmaye ikraam sirf sunnat hi nahin balki waajib tak farmate hain kyunki quran ka hukm hai ki ai imaan waalo jab tum apni jaano par zulm karlo to huzoor ki baargah me haazir ho jao to mard ho ya aurat dono ka huzoor sallallaho taala alaihi wasallam ke rauze ki ziyarat karna us manahi me shaamil nahin baaki kisi ki bhi mazaar ho ijazat nahin

📕 Almalfooz,hissa 2,safah 107

Agar aapke dil me bhi kuchh deeni sawalat ho aur jinka jawab aap maslake AALAHAZRAT ki roushni me chahte ho type karen

Apna naam
Apna shahar
Apna sawal

Aur whatsapp karen 9559893468 par lekin khayal rahe ki jawab ke liye jaldi na karen jab mauqa milega aapko jawab mil jayega in sha ALLAH taa’la

Naushad ahmad “ZEB” razvi
General Secretary,Allahabad
Jamaat Raza-e Mustafa

Leave a Reply

Your email address will not be published.